CRIB என அழைக்கப்படும் இலங்கை கொடுகடன் தகவல் பணியகம் ஒழுங்குமுறைப்படுத்தப்பட்ட உரிமம் பெற்ற கடன் நிறுவனங்களிலிருந்து கடன் சம்பந்தப்பட்ட தகவல்களை மட்டும் திரட்டுவதற்கு சட்டத்தின் மூலம் உருவாக்கப்பட்ட ஒரு தகவல் சேவை வழங்குநர் நிறுவனமாகும். அந்த கடன் வழங்கும் நிறுவனங்கள் இப்பணியகத்தில் பங்குதாரர்களாகவும் இருந்து வருகின்றன. இலங்கை கொடுகடன் தகவல் பணியகம் அத்தகைய தகவல்களை கடனளிப்பு தொடர்பான தீர்மானங்களை மேற்கொள்வதற்கு வாய்ப்பளிக்கும் விதத்தில் பயனுள்ள முறையில் தொகுத்து வழங்குகின்றன.

இலங்கை கொடுகடன் தகவல் பணியகம் கடன் வழங்குபவர்கள் மற்றும் கடன் பெறுபவர்கள் ஆகியோருக்கிடையில் நிலவிவரும் தகவல் இடைவெளியை நிரப்புவதற்கு வசதி செய்து கொடுக்கும் ஒரு நிர்ணயகரமான பாத்திரத்தை வகித்து வருகின்றது. அந்த நிலையில், கொடுகடன் மதிப்பீட்டில் அபாய முகாமைத்துவம் பெருமளவுக்கு விருப்பு வெறுப்பற்றதாகவும், விவேக பூர்வமானதாகவும் மேற்கொள்ளப்படுகின்றது.

உள்ளுர் பொருளாதாரங்களின் உட்பிரதேசங்களுக்கு கொடுகடன்களின் விஸ்தரிப்புக்கு அனுசரனை வழங்குவதில் இப்பணியகம் முனைப்பான ஒரு பாத்திரத்தை வகிக்க வேண்டுமென எதிர்பார்க்கப்படுகின்றது. அத்துடன் அது ஒழுக்காற்றுடன் கூடிய கொடுகடன் கலாசாரம் ஒன்றை தூண்டுவதுடன், நிதி அமைப்பில் போட்டித் திறன் மற்றும் உறுதிப்பாடு என்பவற்றை உருவாக்கிக் கொள்வதற்கும் உதவுகின்றது.